दि. 16 ते 20 ऑक्टोबर 2023 या दरम्यान होणार अर्ज दाखल, तर चिन्हाचे वाटप 25 ऑक्टोबर 2023 होणार असून मतमोजणी दि. 6 नोव्हेंबर रोजी होणार आहे
48 ग्रामपंचायतीसाठी आजपासून नामनिर्देशन पत्र दाखल होणार
बुलढाणा न्यूज – बुलढाणा जिल्ह्यातील 48 ग्रामपंचायतींच्या सदस्यपदांसह थेट सरपंचपदाच्या सार्वत्रिक निवडणुकांसाठी दि.5 नोव्हेंबर 2023 रोजी मतदान होणार आहे. त्यासाठी आचारसंहिता लागू झाली असून मतमोजणी होणार दि. 6 नोव्हेंबर रोजी आहे. यासोबतच 59 ग्रामपंचायतीच्या रिक्त थेट सरपंच आणि सदस्यपदाच्या पोटनिवडणुकीचा कार्यक्रम राबविण्यात येणार आहे.
जानेवारी 2023 ते डिसेंबर 2023 या कालावधीत मुदत संपणार्‍या, तसेच नव्याने स्थापित आणि सन 2022 मध्ये चुकीची प्रभागरचना झाल्यामुळे निवडणुका होऊ शकलेल्या नाही अशा ग्रामपंचायतीच्या सार्वत्रिक निवडणुकीसाठी संगणक प्रणालीद्वारे तसेच ग्रामपंचायतीतील रिक्त जागांच्या पोटनिवडणुकीसाठी पारंपारिक पद्धतीने राबविण्याचा प्रत्यक्ष निवडणूक कार्यक्रम जाहीर करण्यात आला आहे.
सर्व ग्रामपंचायतींच्या निवडणुकांसाठी संबंधित तहसीलदार यांनी निवडणुकीची सूचना दि. 6 ऑक्टोबर 2023 रोजी प्रसिद्ध केली असून नामनिर्देशनपत्र दि. 16 ऑक्टोबर 2023 ते दि. 20 ऑक्टोबर 2023 दरम्यान सकाळी 11 ते दुपारी 3 वाजेदरम्यान दाखल करता येतील.
नामनिर्देशनपत्रांची छाननी दि. 23 ऑक्टोबर 2023 रोजी होईल. नामनिर्देशनपत्र मागे घेण्याची अंतिम मुदत दि. 25 ऑक्टोबर 2023 रोजी दुपारी 3 वाजेपर्यंत असेल व त्याच दिवशी दुपारी 3 वाजल्यानंतर निवडणूक चिन्हाचे वाटप होईल. मतदान दि. 5 नोव्हेंबर 2023 रोजी सकाळी 7.30 ते सायंकाळी 5.30 या वेळेत होईल. मतमोजणी दि. 6 नोव्हेंबर 2023 रोजी होईल. जिल्हाधिकारी कार्यालयातर्फे दि. 9 नोव्हेंबर डिसेंबर 2023 रोजी निवडणुकीच्या निकालाची अधिसूचना प्रसिद्ध करण्यात येणार आहे.
